Disa ditë më parë në media qarkulluan foto nga qyteti i Durrësit, ku koshat e plehrave nuk “ishin prekur me dorë” nga punonjësit e bashkisë për shumë ditë me radhë.
Mbyllja e vend-depozitimit të Porto Romanos, solli që mbetjet e Bashkisë Durrës të dërgoheshin në Manzë për djegie.
Qeveria para disa ditësh zhvilloi një takim me ekspertët dhe u vendos që të gjitha mbetjet e Durrësit do të dërgohen në landfillin e Sharrës në Tiranë.
Alarmi i parë për mbetjet erdhi nga banorët e Manzës.
Këta të fundit protestuan pak ditë më parë duke bllokuar rrugën ku kalonin kamionet me plehra.
Pa pikën e përgjegjshmërisë tonela mbetje u hodhën pranë qendrave të banuara duke helmuar banorët e zonës, por dhe duke iu vënë flaka duke rrezikuar seriozisht shëndetin e tyre.
Mësohet se ditën e hënë qyteti është pastruar, por këto mbeturina nuk janë depozituar asgjëkundi duke u bërë kështu një problematikë e madhe në një kohë që pritet të ringrihet sektori i turizmit në vend nga kriza ekonomike e pandemisë.
Sipas “Shqiptarja.com”, mbeturinat janë lënë nëpër kamionë, pasi nuk ka ende një vend se ku mund të shkarkohen.
Pas mbylljes së landfillit në Porto Romano, duket se situata paraqitet më alarmante se kurrë në mes të sezonit turistik.
Durrësi ka shpallur gjendjen e emergjencës mjedisore, pasi çdo kazan plehrash në qytet është pushtuar nga mbeturinat.
Me rritjen e temperaturave kjo po kthehet në një problematikë edhe për përhapjen e infeksioneve, e ndërkohë Ministria e Mjedisit vazhdon të mos bëjë asgjë në lidhje me këtë situatë alarmante.
Pak minuta më parë ka reaguar në “Twitter” edhe kryeministri Edi Rama, i cili shprehet se nuk do të ketë hedhje plehrash në asnjë zonë të bashkisë në këtë fazë tranzicioni!
Sipas kryeministrit nuk duhet keqpërdorur, shqetësimi i durrsakëve për të nxitur shfaqjet e pakënaqësisë që ushqehet me lajme të rreme.
“Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni!”, shkruan Rama.
Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni!
— Edi Rama (@ediramaal) June 16, 2020
