Operacioni Forca e Ligjit i ka kërkuar deklaratën e pasurisë Plarent Dervishajt në Durrës dhe Suel Çelës në Elbasan.
Brenda 48 orëve Dervishaj dhe Çela duhet të sqarojnë burimin e pasurisë së tyre.
Të dy këta persona janë emra të njohur për drejtësinë shqiptare.
Suel Çela përplasi 3 vite më parë makinën e policisë tek tregu agro-ushqimor në Elbasan, por pas një sërë procesesh gjyqësore arriti të fitonte lirinë.
Për këtë ngjarje u dënuan Klement Xhaferri me 5 vite dhe Ene Bekteshi me 6 vite burg.
Policët e përfshirë në ngjarje nuk arritën të përcaktonin, nëse e kishin parë Çelën, mbrëmjen kur ndodhi ngjarja.
Ndërkohë Plarent Dervishaj, ish-anëtar i bandës së Durrësit, akuzohet për trafik të qënieve njerëzore në Gjermani.
Më 20 qershor të vitit të kaluar, Dervishaj i shpëtoi mrekullisht një atentati në zonën e ish-Kënetës në Durrës.
Në makinë me të ndodhej Julian Meçaj dhe shoferi, të cilët po ashtu mbetën të plagosur, por nuk patën rrezik për jetën.
Plarent Dervishaj la qelinë në vitin 2017, pas vendimit të Gjykatës së Lartë.
Ai ka qenë i dënuar përjetë në mungesë për vrasjen e Arsel Sotirit, Ilir Nelajt, Agim Rexhepit, Dritan Sallakut dhe Dritan Dishës.
Dënimi rrëzua në Gjykatën e Lartë, ndërsa rigjykimi në Apelin e Krimeve të Rënda i dha pafajësi.
