Drejtori i Urgjencës Kombëtare, Skënder Brataj tha se vendi ynë nuk mendon një karantinim të dytë, por dha detaje se kur mund të ndodhë një gjë e tillë.
I ftuar në “Opinion” Brataj tha se vendi ynë mund të shkojë në një karantinë të dytë, vetëm kur numri i të hospitalizuarve të shkojë në 400, pasi edhe kapaciteti i shtretërve është 400.
“Për momentin as që e mendojmë të mbyllemi prapë në karantinë. Në mund të mbyllemi vetëm nëse numri i kapaciteteve në spitale arrin aq shumë saqë i saturon të gjitha resurset tona, si në burime njerëzore pra në mjekë e infermierë, si në shtretër, do ndohë si në të gjithë botën. Ne momentalisht kemi 400 shtretër, 55 janë të zënë, nëse numri i pacientëve që kërkojnë hospitalizim i kalon 400 të shtruar në spitale, atëherë s’kemi çfarë të bëjmë dhe do duhet të mbyllemi, por që nuk mendoj se do shkojmë deri aty. Tani kemi dhe një gjë pozitive pasi koha e shërimit është më e shkurtër se më parë”, tha Brataj.
Sipas Bratajt asnjë ekspert nuk e mendon një skenar të tillë dhe gjëja pozitive e kësaj vale të dytë është se kohëzgjatja e të sëmurit është më e shkurtër se në fillim.
Brataj bëri thirrje që maska të përdoret edhe në ambiente të mbyllura pasi mosha e thyer është më e rrezikuara dhe duhet të qëndrojë në shtëpi.
