Gjykata e Posaçme është tërhequr për vendim pas përfundimit të seancës paraprake lidhur me çështjen “Partizani”, ku të pandehur janë ish-kryeministri Sali Berisha, dhëndri i tij Jamarbër Malltezi dhe disa persona të tjerë.
Seanca e sotme shënoi mbylljen e qëndrimeve të palëve, ku i fundit që foli ishte avokati i kompanisë “Homeplan”.
Menjëherë pas kësaj, trupa gjykuese u tërhoq për të marrë një vendim mbi ecurinë e mëtejshme të çështjes.
Mbrojtja ka kërkuar pushimin e procedimit dhe pavlefshmërinë e një sërë provash të paraqitura nga SPAK, ndërsa Prokuroria e Posaçme ka insistuar që çështja të kalojë për gjykim të plotë.
Vendimi i GJKKO-së pritet të përcaktojë nëse dosja, e dorëzuar në gjykatë rreth gjashtë muaj më parë, do të vijojë me gjykim të plotë apo do të rrëzohet në këtë fazë.
Procesi nisi më 24 tetor 2024, por është zvarritur për afro gjashtë muaj përmes shtyrjesh të njëpasnjëshme. Nëse çështja kalon për gjykim, do të jetë rasti i parë penal ndaj ish-kryeministrit Berisha, i cili ndodhet nën masën e “detyrimit për paraqitje” për korrupsion pasiv.
Ndërkohë, dhëndri i tij, Jamarbër Malltezi, ndodhet në arrest shtëpie, i akuzuar për korrupsion pasiv dhe pastrim parash.
Në këtë dosje përfshihen edhe biznesmeni Fatmir Bektashi, i akuzuar për korrupsion aktiv dhe pastrim parash, Xhimi Begeja bashkëpronar i “Homeplan” dhe trashëgimtar i truallit të ish-Klubit Partizani, si dhe financierja Andia Pustina, e cila sipas SPAK ka menaxhuar transaksionet financiare të skemës së dyshuar.
Sipas hetimit, përmes privatizimit të truallit të klubit sportiv janë ndërtuar të paktën 19 kulla pallatesh, në një nga projektet më të mëdha të zhvillimit privat në Tiranë.
