Trupa gjykuese që do të shqyrtojë dosjen “Partizani” është përzgjedhur përmes shortit elektronik, me Elsa Ullirin në krye të trupës dhe dy gjyqtarët Bib Ndreca e Rudina Palloj si anëtarë.
Nga shorti u përjashtuan gjyqtaret Flojera Davidhi dhe Irena Gjoka. Ishte pikërisht Davidhi ajo që më 30 maj dorëzoi vendimin e zbardhur të seancës paraprake, duke i hapur rrugë gjykimit të çështjes pas një periudhe shtatëmujore zvarritjesh procedurale.
Në këtë dosje të bujshme janë të pandehur kryetari i PD-së Sali Berisha dhe dhëndri i tij Jamarbër Malltezi, të akuzuar për korrupsion në lidhje me privatizimin e ish-kompleksit sportiv “Partizani”, si dhe dy biznesmenë e një notere.
Berisha, i cili më 27 nëntor 2024 doli nga arresti shtëpiak pas një viti, ka cilësuar vendimin për masën e sigurisë “detyrim paraqitje” si një “krim kushtetues”, duke akuzuar prokurorët e SPAK se po kërkojnë masa ndaj tij për shkak të qëndrimeve të tij kritike ndaj Prokurorisë së Posaçme dhe gjykatës.
