Prokuroria e Tiranës ka kaluar për kompetencë në Prokurorinë e Posaçme (SPAK) dosjen penale që trajton hetimin e krijimit dhe bashkëpunimit në skema mashtruese të mikrokredive. Hetimet kanë zbuluar se këto skema kanë abuzuar me mijëra qytetarë, duke i detyruar ata të rifinancojnë kredite me kushte të disfavorshme ose duke ushtruar shantazh, përfshirë bllokimin e pasurive të luajtshme dhe të paluajtshme.
Në prill, Prokuroria e Tiranës kishte dërguar për hetim në SPAK edhe guvernatorin e Bankës së Shqipërisë, Gent Sejko, në lidhje me këtë çështje, dyshuar për mosveprim në kohë për të parandaluar këto abuzime.
Ky hetimi ka nisur në vitin 2018 dhe përfshin shoqëritë financiare të licencuara që vepronin si mikrokredi, duke krijuar një grup kriminal të strukturuar për të përfituar në mënyrë të paligjshme, duke shkelur ligjin dhe duke shkaktuar dëme të mëdha për qytetarët.
Hetimet e deritanishme kanë identifikuar individë kyç si Olsi Ibro, i cili humbi jetën në korrik, bashkëshorten e tij Elda Ibro dhe Arben Meskutin si drejtues të skemës. Ata, së bashku me individë të tjerë, udhëhoqën dhe administruan shoqëritë si Micro Credit Albania (MCA) dhe Final, të cilat blenë borxhe të këqija dhe realizuan sekuestrime të pasurive përmes procedurave të paligjshme.
Një nga karakteristikat kryesore të skemës ishte manipulimi i të dhënave personale të qytetarëve, duke përfshirë të dhëna mbi të ardhurat e tyre dhe marrëdhëniet familjare, për të ushtruar presion ndaj tyre dhe për t’i shtrënguar të pranojnë ristrukturime kredie që shumëfishonin borxhet e tyre.
Kjo ka përfshirë edhe përdorimin e përmbaruesve të përfshirë në procesin e zhvatjes, duke ndërmarrë aksione përmbarimore të paligjshme, shpesh pa njoftuar debitorët dhe duke krijuar ankande fiktive për kalimin e pasurive të paluajtshme në pronësinë e kompanive të përfshira.
Nga hetimet, është zbuluar se mijëra pasuri të paluajtshme janë sekuestruar dhe kaluan në pronësinë e shoqërive MCA dhe Final, ndonëse shumë herë ato nuk ishin në lidhje me detyrimin fillestar. Në disa raste, janë sekuestruar pasuri që nuk kishin asnjë lidhje me borxhet origjinale të qytetarëve, duke krijuar pasoja të rënda sociale dhe financiare për ta, duke përfshirë raste ekstreme si vetëvrasjet e disa individëve të prekur nga kjo skemë.
Prokuroria ka konkluduar se ky grup kriminal ka përfituar miliona euro në mënyrë të paligjshme, dhe ka pasur një ndikim të thellë negativ në jetën dhe pasuritë e qytetarëve të prekur, me shumë nga ata që ishin individë të pafuqishëm financiarisht dhe që nuk kishin mundësi të kërkonin ndihmë ligjore.
