Tashmë të gjithë e njohin çështjen “Babalja”, ku Partia Demokratike ishte ajo që publikoi dy audioregjistrime dhe ku më pas kërkoi largimin e Fatmir Xhafajt nga posti i ministrit. Në këto audioregjistrime supozohej se vëllai i ish-ministrit Xhafaj ishte i përfshirë në trafikimin e lëndëve narkotike.
Ditën e sotme gjykata e Tiranës nuk e ka pranuar kërkesën e Fredi Alizotit për gjykim të shkurtuar.
Kjo kërkesë e Alizotit është bërë që prej ditës kur është marrë në gjykim dosja. Fredi Alizoti është në gjykim për dosjen “Babale” e cila është marrë në shqyrtim nga gjykata në 12 prill 2019.
Të pandehur të tjerë në këtë dosje janë Fredi Alizoti, Jetmir Olldashi, Albert Veliu dhe ish-deputeti i PD-së, Ervin Salianji.Ish-deputeti Ervin Salianji, Albert Veliu, i njohur si ‘Babale’ dhe gazetari Jetmir Olldashi kanë kërkuar pushim të çështjes.
Nga ekspertiza që i është bërë kampionit të zërit, nuk vërtetohet se zëri që dëgjohet në audio është i Agron Xhafajt, por i Alizotit, i cili pranonte se kishte imituar zërin e vëllait të ministrit, pasi iu ishin premtuar 200 mijë euro nga deputeti me mbiemrin Salianji. Ai u shpreh se kishte vendosur të tregonte të vërtetën pasi “Babalja” nuk i kishte dhënë pjesën e parave që i detyrohej.
Për gazetarin Jetmir Olldashi, i cili ka realizuar intervistën me “Babalen” u dha masa detyrim paraqitjeje.
