Gjykata e Posaçme ka dhënë vendimin për çështjen e njohur si dosja “5D”, duke dënuar drejtoreshën e Klubit Sportiv Tirana, Deborah Keçi, si dhe tre të pandehurit e tjerë, Teuta Guri, Reinaldo Gjerazi dhe Jetjon Meraj.
Deborah Keçi u shpall fajtore për shkelje të barazisë në tendera dhe u dënua me 1 vit burg, që për shkak të gjykimit të shkurtuar u konvertua në 8 muaj. Në fund, dënimi i saj u zbut në 60 orë punë në interes publik, ndërsa asaj iu hoq e drejta për të ushtruar funksione publike për 5 vite.
Tre të pandehurit e tjerë, Teuta Guri, Reinaldo Gjerazi dhe Jetjon Meraj, fillimisht u dënuan me 9 muaj burg, por pas gjykimit të shkurtuar, dënimi u reduktua në 6 muaj burg, të cilët gjithashtu iu konvertuan në 60 orë punë në interes publik secilit prej tyre.
Vendimet:
• Deborah Keçi – 1 vit burg për shkelje të barazisë në tendera; 8 muaj me gjykim të shkurtuar; dënimi u pezullua dhe u zëvendësua me 16 muaj shërbim prove; ndalim për 5 vjet për të ushtruar funksione publike.
• Teuta Guri – 9 muaj burg, u reduktua në 6 muaj me gjykim të shkurtuar; 60 orë punë në interes publik.
• Reinaldo Gjerazi – i njëjti dënim si Guri; 60 orë punë në interes publik.
• Jetjon Meraj – po ashtu 9 muaj, u reduktua në 6 muaj; 60 orë punë në interes publik brenda 6 muajsh.
Nga hetimet rezultoi se Deborah Keçi, si titullare e autoritetit kontraktor në Klubin Sportiv Tirana, në bashkëpunim me anëtarët e Komisionit të Vlerësimit të Ofertave (Teuta Guri, Jetjon Meraj dhe Reinaldo Gjerazi), favorizuan në mënyrë të paligjshme operatorin ekonomik “5D Konstruksion” sh.p.k. në tenderin për “Rikonstruksionin e Palestrës së Mundjes”, procedurë e zhvilluar më 9 dhjetor 2020.
SPAK ka mbledhur prova që tregojnë se “5D Konstruksion”, shoqëri e lidhur indirekt me ish-funksionarët e Bashkisë Tiranë, Redi Molla dhe Mariglen Qato, ka fituar kontrata publike në kundërshtim me rregullat e prokurimit, duke përfituar nga autoritetet “Tirana Parking” dhe “Klubi Sportiv Tirana”.
Gjithashtu, u vërtetua se Deborah Keçi ka bashkëpunuar me përfaqësuesin e operatorit ekonomik “V.A.S Konstruksion” sh.p.k që të paracaktohej fitues i tenderit, edhe para nisjes së procedurës së prokurimit. Anëtarët e Komisionit nuk kanë kryer vlerësimin e ofertave në përputhje me ligjin, duke favorizuar në mënyrë të paligjshme këtë operator.
Në përfundim, të pandehurit u shpallën fajtorë për shpërdorim detyre dhe shkelje të rregullave të prokurimit publik.
