Përfaqësuesi i lëvizjes “Diaspora për Shqipërinë e Lirë”, Florjan Haçkaj, ka depozituar një kallëzim penal në SPAK ndaj disa zyrtarëve të lartë të qeverisë, përfshirë zv/kryeministren Belinda Balluku.
Sipas Haçkajt, këta zyrtarë kanë shkelur Kodin Zgjedhor përmes patronazhimit të votës së emigrantëve shqiptarë, duke përfshirë grumbullimin e të dhënave personale dhe ndërtimin e databazave me qëllim ndikimin e votës së tyre.
Ai përmendi rastin e kryetares së Bashkisë Lushnje, Eriselda Sefa, e cila sipas tij ka krijuar një sistem të dhënash për emigrantët e zonës që drejton, me qëllim kontrollin e votës së tyre.
Sipas denoncimit, janë përdorur emra, adresa dhe numra telefoni të qytetarëve shqiptarë që jetojnë jashtë vendit, sidomos në Greqi, ku pretendohet se ka pasur një regjistrim masiv të diasporës për qëllime elektorale.
“Ne kemi dorëzuar provat për patronazhimin e qindra emigrantëve dhe kemi kallëzuar zyrtarisht disa ministra. Kemi kërkuar hetim edhe më herët në KQZ, në Prokurorinë e Përgjithshme dhe tani sërish në SPAK”, deklaroi Haçkaj.
Ai theksoi nevojën për transparencë dhe kërkoi që rezultatet e hetimeve për krimet zgjedhore të publikohen përpara zgjedhjeve të 11 majit, në mënyrë që procesi të mos komprometohet pas certifikimit të rezultateve.
Në fund, Haçkaj u bëri thirrje qytetarëve shqiptarë që votojnë nga jashtë vendit të respektojnë ligjin dhe të mos fotografojnë votën, pasi një veprim i tillë përbën vepër penale dhe ndëshkohet me burg nga 3 muaj deri në 3 vite.
“Të mbrojmë fshehtësinë e votës me çdo kusht”, përfundoi ai.
