Tensionet mes Kinës dhe Shteteve të Bashkuara të Amerikës janë shumë të larta në këto ditë të pandemisë, pasi drejtuesit e lartë të SHBA, përfshirë presidentin Trump, e kanë akuzuar hapur Kinën se ka fshehur informacione për virusin në mënyrë të qëllimshme, madje SHBA dyshon se virusi ka dalë nga një laborator.
Nga ana tjetër, një tabloid nacionalist kinez, nën kontrollin e Partisë së Punës të Kinës ka hedhur poshtë pretendimet e administratës të Donald Trump se pandemia e koronavirusit e ka origjinën nga një laborator në Wuhan, duke bërë që tensionet në replika mes të dy shteteve të rritet nga dita në ditë.
Disa ditë më parë, ‘New York Times’ shkruan se ka siguruar një raport kinez që paralajmëron se Pekini mund të përballet me një valë armiqësie pas shpërthimit të koronavirusit që mund të çojë deri në konfrontim të armatosur me Shtetet e Bashkuara të Amerikës.
Raporti është hartuar nga Instituti i Kinës i Marrëdhënieve Ndërkombëtare Bashkëkohore (CICIR), një qendër studimi e lidhur me Ministrinë e Sigurisë së Shtetit, organi më i lartë i inteligjencës i Kinës.
Trump tha më 1 maj se ka parë prova që i japin atij një “shkallë të lartë besimi” se koronavirusi doli nga një laborator kinez i virologjisë.
Së fundmi, kreu i Shtëpisë së Bardhë ka akuzuar përsëri Kinën për trajtimin që i ka bërë pandemisë së koronavirusit, duke kërcënuar se do t’i japë fund marrëdhënieve me Pekinin.
“Ka shumë gjëra që mund të bëjmë. Ne mund të ndërpresim tërë marrëdhënien”, tha Trump në intervistën për televizionin Fox Business.
Shtetet e Bashkuara janë vendi më i prekur botë nga sëmundja Covid-19 dhe deri më tani, janë konfirmuar 1,451,696 të infektuar dhe 86,603 viktima.
Më herët u njoftua se rreth 36 milionë amerikanë janë regjistruar si të papunë, që nga shpërthimi i epidemisë së koronavirusit në SHBA, në mesin e muajit mars.
