Sot në Gramsh u zhvillua një protestë e prindërve përpara Bashkisë, në reagim ndaj infektimit të 17 fëmijëve me salmonelë në Kopshtin Publik Nr. 1. Megjithatë, pjesëmarrja në tubim ishte e kufizuar, pasi disa prindër shprehën frikën për të humbur vendin e punës.
Një prej prindërve tha se shteti nuk ka treguar interes për gjendjen e fëmijëve dhe se reagimi i autoriteteve ka qenë i mangët. Ai shtoi se nuk ka marrë asnjë udhëzim mbi mënyrën e veprimit, ndonëse salmonela është një infeksion ngjitës që mund të prekë edhe anëtarët e tjerë të familjes.
“Përgjigjen për infektimin e fëmijës e mora vetëm dje, pasi u përfshiva në debate në kopsht, sepse më herët na mohohej informacioni. Askush nuk na ka pyetur për gjendjen e fëmijës. Kam blerë mjekime me para të mia, sepse shteti nuk ka ndërmarrë asnjë masë,” u shpreh prindi. Ai gjithashtu vuri në dyshim mënyrën e menaxhimit, duke sugjeruar se tenderët për furnizimin ushqimor janë dhënë në mënyrë të dyshimtë, për kompani jashtë qytetit.
Në një prononcim për “News24”, një nënë tjetër shprehu shqetësimin për gjendjen shëndetësore të djalit të saj, i cili vazhdon të ketë dhimbje barku dhe diarre edhe pas disa ditësh trajtimi.
“Fëmija u diagnostikua me salmonelë, por fillimisht menduam se ishte vetëm grip. Tani kemi edhe një vajzë tjetër, për të cilën kemi bërë analizat dhe presim rezultatet. Kemi tetë ditë që jetojmë me frikë dhe ankth. Kërkojmë garanci për ushqimin që u jepet fëmijëve tanë,” tha ajo.
Rasti ka ngritur shqetësime të mëdha në komunitetin lokal, ku prindërit kërkojnë përgjegjësi më të madhe dhe masa strikte për kontrollin e sigurisë ushqimore në institucionet arsimore, për të parandaluar ngjarje të ngjashme në të ardhmen.
