Protesta gjithëkombëtare e thirrur nga ish-pjesëtarët e Ushtrisë Çlirimtare të Kosovës, që do të mbahet këtë të premte në Tiranë, po merr mbështetje gjithnjë e më të gjerë.
Endriti Thaçi, djali i ish-presidentit të Kosovës, Hashim Thaçi, ka shpërndarë në rrjetet sociale thirrjen për pjesëmarrje në protestë, duke e shoqëruar me mesazhin “A jeni gati?”. Me këtë postim në Instagram, ai ka ftuar qytetarët nga të gjitha trojet shqiptare t’i bashkohen tubimit që kërkon drejtësi për ish-udhëheqësit e UÇK-së të ndodhur në paraburgim në Hagë.
Mbështetje të hapur ka dhënë edhe grupi i tifozëve “Dardanët”, të cilët në një deklaratë publike theksojnë se protesta e 17 tetorit është një thirrje për drejtësi, jo vetëm për ish-krerët e UÇK-së, por për të gjithë ata që luftuan për liri.
“Duam drejtësi dhe jo barazi farse me kriminelët shovinistë serbë. Të bashkuar në emër të mbrojtjes së vlerave të përbashkëta, përçojmë një mesazh të fuqishëm nga kryeqyteti shqiptar se UÇK-ja nuk kreu krime lufte. Adresa e krimeve është vetëm Beogradi famëkeq,” thuhet në reagimin e tyre.
Protesta do të zhvillohet në sheshin “Skënderbej” në orën 17:00. Në tubim pritet të marrin pjesë kryeministri Edi Rama, ish-presidenti Alfred Moisiu dhe lideri i shqiptarëve të Maqedonisë së Veriut, Ali Ahmeti.
Organizatorët paralajmërojnë një pjesëmarrje masive nga të gjitha trevat shqiptare, në shenjë solidariteti me figurat kryesore të luftës për çlirimin e Kosovës.
