Naftëtarët grevistë të Rafinerisë së Ballshit, sot janë në ditën e tyre të nëntë të grevës së urisë.
Deri më tani disa prej tyre janë detyruar të lënë grevën për shkak të përkeqësimit të gjendjes së tyre shëndetësore, duke u zëvendësuar me naftëtarë të tjerë që luftojnë për kauzën e njëjtë, dhënien e 25 rrogave të pamarra të tyre!
Gjatë paradites së sotme asnjë autoambulancë nuk ishte e pranishme në vendin ku po zhvillohet greva e urisë, por stafi mjeksor i Spitalit të Ballshit kanë vizituar grevistët për të parë gjendjen e tyre dhe parametrat e tyre jetësore.
Kreu i Sindikatës së Bashkuar të Naftëtarëve, Sokol Dautaj, e quajti skandaloze dhe të papërgjegjshme heshtjen e të gjithë institucioneve shtetërore në lidhje me apelin e tyre për marrjen e pagave të prapambetura dhe rinisjen e punës në Uzinë.
“Këta nuk e vrasin mendjen fare për ne, nuk e di se ku e gjejnë kurajon. Po votat kur t’i kërkojnë këtu ku do t’i gjejë. Ne jemi edhe me probleme shëndetësore. Por ky bojkot i të gjithë institucioneve shtetërore është skandal. Nuk kemi parë as avokatin e Popullit, as kreun e KLSH që të ndjekë situatën tonë”, ka thënë Sokol Dautaj.
Ndërkohë edhe një tjetër naftëtar grevist i revoltuar, deklaroi se askujt nuk duhet t’i shkojë ndërmend që të bojkotojnë përpjekjet e 900 naftëtarëve që kërkojnë të drejtat e tyre, pagat e prapambetura dhe rifillimin e punës në Uzinë.
Naftëtarët pretendojnë se kanë pa marrë 25 paga të prapambetura. Pas shumë protestave dhe pas shumë peripecive ndër vite për kërkimin e të drejtave të tyre, përfaqësuesit e Sindikatës së Naftëtarëve janë futur tashmë prej 9 ditësh në grevë urie si dhe kanë zaptuar Uzinën e Rafinerisë së naftës ku më parë punonin.
