Tensionet në Afganistan nuk janë ndalur që prej ardhjes në pushtet të talebanëve, teksa edhe incidentet kanë qenë të shumta. Të paktën dy persona u vranë dhe 19 të tjerë u plagosën në shpërthime të ndara në qytetin lindor afgan të Jalalabad të shtunën, sipas një zyrtari shëndetësor dhe mediave lokale.
Sulmet, të cilat kishin në shënjestër automjetet talebane, janë shpërthimet e para vdekjeprurëse që nga tërheqja e trupave amerikane nga Afganistani. Një zyrtar nga departamenti i shëndetësisë i Provincës Nangarhar tha për AFP se tre persona u vranë dhe 18 u plagosën, ndërsa disa media lokale raportuan se sulmet lanë të paktën dy të vdekur dhe 19 të plagosur.
Jalalabad është kryeqyteti i Nangarhar, zemra e grupit të Shtetit Islamik në Afganistan, i cili mori përgjegjësinë për një sulm të përgjakshëm që vrau më shumë se 100 njerëz në aeroportin e Kabulit në fund të gushtit gjatë evakuimeve.
Talibanët u kthyen në pushtet në mes të gushtit pas rrëzimit të qeverisë së mëparshme dhe ata kanë premtuar se do të rivendosin paqen dhe sigurinë në vend.
Fotografitë e marra në vendin e shpërthimit treguan një kamion të gjelbër me flamur të bardhë taleban të rrethuar nga mbeturinat e shpërrthimeve, ndërsa talebanë të armatosur ishin të pranishëm.
