Një javë pas nisjes së regjistrimit të emigrantëve për zgjedhjet parlamentare të 11 majit, procesi po përballet me fluks të lartë aplikimesh dhe problematika në dokumentacion.
Të dhënat tregojnë se 35% e aplikimeve janë refuzuar nga Komisioni Qendror i Zgjedhjeve (KQZ), kryesisht për shkak të gabimeve në deklarimin e adresës së vendbanimit jashtë vendit.
Juristi Franc Nuri shpjegon:
“Problemi kryesor është se adresa e deklaruar në formular nuk përputhet me dokumentet e kërkuara për ta vërtetuar atë. Po ashtu, ka raste kur lidhja e aplikantit me adresën e rezidencës është e pasqaruar.”
Për të shmangur këto gabime, emigrantët duhet të ngarkojnë në platformën elektronike dokumente që provojnë qartësisht vendbanimin e tyre. Në rastet kur rezidenca është në emër të kryefamiljarit, duhet të shtohen dokumente shtesë si certifikata familjare për të dëshmuar lidhjen me atë adresë.
KQZ është përballë një presioni kohor për të menaxhuar këtë proces dhe për të verifikuar kërkesat brenda afateve të përcaktuara. Operatorët kanë deri në 5 ditë për të pranuar ose refuzuar një aplikim. Në rast refuzimi, emigrantët mund të aplikojnë sërish duke korrigjuar të dhënat e pasakta.
Regjistrimi i diasporës përbën një hap të rëndësishëm drejt garantimit të pjesëmarrjes së saj në zgjedhjet e ardhshme.
