I Dërguari Special për dialogun Kosovë-Serbi i Presidentit Donald Trump, Richard Grenell, ka folur përpara takimit të dy delegacioneve në Shtëpinë e Bardhë.
Grenell është shprehur se është primare që Kosova dhe Serbia të normalizojnë marrëdhëniet ekonomike.
Me anë të një postimi në rrjetin social tëitter, Grenell ka shkruar se është i përqëndruar tek brezat e rinj të të dyja vendeve që kërkojnë karrierë, punë të mira dhe lidhje me perëndimin.
Ai ka theksuar se gjatë takimit të Washington, do të këmbëngulë tek palët në dialog që të shtyjnë përpara agjendat ekonomike, duke lënë më anash aspektin politik.
“Njerëzit e Kosovës dhe Serbisë meritojnë normalizim të ekonomisë dhe shanse për të krijuar një ekonomi që sjellë përfitim. Sot jam i fokusuar te njerëzit e rinj që duan karrierë, një punë të mirë dhe lidhje me perëndimin. Ju kam dëgjuar dhe do ta shtyej përpara këtë agjendë. Le ta lëmë politikën anash”, ka shkruar Grenell.
Me ftesë të Këshilltarit për Siguri Kombëtare të presidentit Trump, Robert O’Brien, pritet që të mbahet nesër në Shtëpinë e Bardhë, takimi i radhës për dialogun Kosovë-Serbi.
Të dyja palët parashikohet që të flasin kryesisht për tema ekonomike, ndërkohë nuk është përjashtuar edhe diskutimi për tema politike.
Në këtë takim delegacioni kosovar do të përfaqësohet nga kryeministri Avdullah Hoti, zëvendëskryeministrat, Driton Selmanaj dhe Albulena Balaj-Halimi, koordinatori shtetëror për dialogun, Skënder Hyseni, si dhe ministrat, Selim Selimi, Meliza Haradinaj-Stublla dhe Arban Abrashi.
