Një ndotje masive ka përfshirë vijën bregdetare në qarkun e Fierit, pas përmbytjeve të fundit të shkaktuara nga vërshimi i lumenjve Seman dhe Vjosë. Rreth 18 kilometra bregdet rezultojnë të mbuluara nga mbetje të shumta urbane, duke krijuar një situatë alarmante për mjedisin.
Në zonat bregdetare të Darëzezës dhe Semanit janë depozituar tonelata mbetjesh, kryesisht materiale plastike dhe drusore. Ajo që lumenjtë derdhën në detin Adriatik, është kthyer sërish në breg nga dallgët, duke e përkeqësuar ndjeshëm situatën dhe duke ekspozuar hapur shkallën e ndotjes.
Pamjet nga terreni tregojnë grumbuj mbeturinash të shpërndara përgjatë vijës bregdetare, ndërsa ndotja përbën një rrezik serioz për ekosistemin detar dhe faunën e zonës. Mbetjet kanë qëndruar për ditë të tëra si në breg ashtu edhe në ujë, duke rritur ndotjen dhe dëmet mjedisore.
Ndërhyrja për pastrimin e zonës ka nisur vetëm rreth 10 ditë pas përmbytjeve, një vonesë që ka lejuar përhapjen dhe thellimin e ndotjes. Situata ka ngritur shqetësime për menaxhimin e mbetjeve dhe reagimin institucional në raste emergjente mjedisore.
