1.3 ton kokainë janë kapur sot në Maqedoninë e Veriut në një magazinë frutash, pasi janë transportuar me një kamion bananesh, që ka hyrë dje nga Mali i Zi në Shkodër dhe ka dalë po dje nga dogana e Qafë-Thanës për në Maqedoni.
Së fundmi, detaje të reja janë zbardhur rreth ngjarjes në fjalë, ku mësohet se sasia prej 1.3 tonë kokainë ka kaluar nga Shqipëria përmes pikës kufitare të Hanit të Hotit, në Shkodër, dhe më pas ka dalë nga pika kufitare e Qafë Thanës, duke hyrë në Maqedoninë e Veriut, aty ku u kap, para se të mbërrinte në destinacionin final, Slloveni.
Lënda narkotike është sjellë me një kamion bananesh nga Amerika, teksa mësohet se policia shqiptare ka qenë në dijeni të këtij mjeti, i cili është futur dje në Shqipëri, pasi ka kaluar nga Mali i Zi.
Në megaoperacionin për kapjen e sasisë në fjalë kanë marrë pjesë përveç forcave maqedonase, edhe DEA amerikane, Guardia di Finanza, policia shqiptare dhe policitë e disa vendeve të tjera.
Deri më tani kanë rënë në pranga tre persona, dy shoferë dhe një magazinier, që punonin në këtë magazinë.
