Sipas burimeve nga grupi hetimor, policia ka konfirmuar me anë të pamjeve filmike se Shkëlqim Dukaj, autori i dyshuar, ka mbajtur nën mbikëqyrje Eduart Reçin për një periudhë 6-ditore.
Hetimet kanë marrë një kthesë të rëndësishme pas sekuestrimit dhe analizimit të materialeve filmike nga zona e ngjarjes.
Nga këto pamje rezulton se Dukaj ka qëndruar në pritje të Reçit nga data 8 nëntor deri më 13 nëntor, kur ka kryer vrasjen. Pamjet e kamerave të sigurisë tregojnë Dukajn duke u pozicionuar në një shkallë metalike të një hoteli afër lokali të tij, nga ku kishte pamje të oborrit të pallatit të Reçit.
Policia ka identifikuar një person që pozicionohet si përgatitje për të qëlluar me armë, duke përdorur edhe dylbi.
Nga 8 deri në 13 nëntor, Dukaj ka monitoruar Reçin çdo mbrëmje nga ora 7 deri në 11, përveç datës 11, kur ai ka qenë në punë.
Hetuesit dyshojnë se autori mund të ketë qëlluar edhe më 8 nëntor, por plumbi nuk e ka shënjestruar objektivin. Pas disa ditëve survejimi, më 13 nëntor, rreth orës 22:40, Dukaj ka qëlluar përfundimisht drejt Reçit.
Pas arrestimit të tij dhe të vëllait, policia ka kryer kontrollime në shtëpitë dhe lokalet e tyre, duke gjetur prova që i lidhin me krimin, por ende nuk është gjetur arma e përdorur në ngjarje.
