Ka dështuar për të 25-ën herë përpjekja për konstituimin e Kuvendit të Kosovës. Seanca e fundit u ndërpre sërish, pasi nuk u arrit të votohej Komisioni për votim të fshehtë, një hap i domosdoshëm për zgjedhjen e kryeparlamentarit.
Në sallë ishin të pranishëm 104 deputetë, por vetëm 51 votuan pro, një kundër dhe asnjë abstenim, çka nuk mjaftoi për të çuar përpara procesin.
Kryesuesi Avni Dehari i kërkoi subjekteve opozitare, PDK, LDK, AAK, Nisma dhe Listës Serbe, të propozonin anëtarët e tyre për komisionin, por këto parti nuk morën pjesë në votim dhe refuzuan të japin emra.
Sipas rregullores, emërimi i kandidatit për kryetar Kuvendi i takon partisë që ka fituar zgjedhjet, në këtë rast Lëvizjes Vetëvendosje, e cila ka propozuar Albulena Haxhiun për këtë post.
Megjithëse ka sinjalizuar gatishmëri për marrëveshje me subjektet e tjera politike, Vetëvendosje ka refuzuar të tërheqë kandidaturën.
Përveç kryetarit, Kuvendi duhet të zgjedhë edhe pesë nënkryetarë për të përfunduar procesin e konstituimit. Vetëm pas kësaj mund të nisë formimi i qeverisë së re.
Kriza aktuale vjen për shkak të mungesës së një shumice të qartë në Kuvend dhe dështimeve për të ndërtuar një koalicion qeverisës.
Seanca e radhës është thirrur për 4 qershor, në orën 10:30.
