Në Gjykatën e Posaçme Kundër Korrupsionit dhe Krimit të Organizuar, u zhvillua këtë të mërkurë seanca e radhës për çështjen e rrëmbimit dhe zhdukjes së Jan Prengës, ku dëshmuan dy vëllezërit e viktimës.
Dëshmitarët u thirrën nga Prokuroria e Posaçme Antikorrupsion për të dhënë deklaratat e tyre në lidhje me ngjarjen.
Ndrek Prenga, një nga vëllezërit e Janit, deklaroi se nuk ka pasur asnjë njohje me Dritan Rexhepin, i cili dyshohet se ka urdhëruar rrëmbimin dhe zhdukjen e vëllait të tij.
“Nuk e njoh Dritan Rexhepin. Kam marrë një mesazh në telefon nga një person që u prezantua si Gramoz. Ai më tha: ‘Jam Gramozi, gjërat janë të miat, mos t’i prekni.’ Nuk njoh asnjë nga këta që përmenden në këtë ngjarje. Nëse më tregoni një foto të personit me të cilin kam folur përmes kamerës, ndoshta mund ta njoh. Nuk jam 100% i sigurt, por mendoj se do ta njoh.”
Në lidhje me lidhjet mes të përfshirëve, Prenga shtoi:
“Nuk e kam pyetur Gentjan Doçin nëse ai njihte Gramozin. Mund ta kem pyetur, por nuk e mbaj mend saktësisht. Gentjan Doçi më tha: ‘Më keni marrë gjërat.’ Unë i thashë se isha në burg. Të nesërmen, më njoftoi se kishin marrë vëllain tim peng. Kur dolën pamjet filmike origjinale, ndjeva se më konfirmoi një person i tretë.”
Prokurori Dibra:
“Pse mendon se Doçi ta rrëmbeu vëllain?”
Ndrek Prenga:
“Sepse ishte ai që më mori në telefon. Gramozi nuk më tha asgjë konkrete. Kur më mori Gramozi, unë i thashë se isha në burg, dhe folëm me kamer. Nuk më intereson kush është Gramozi apo kush janë Doçi-t. Nuk dua ta mbroj Gramozin, por ai nuk më ka borxh.”
