Fermerët e Lushnjes, Divjakës, Rrogozhinës, Beratit dhe Fierit kanë protestuar sërish në Lushnjë.
Protesta e ditës së sotme është e treta brenda këtij muaji, shkruan ‘Balkanweb’.
Kësaj radhe fermerët janë të organizuar në shoqatën bujqësore, ‘Fermerët e Myzeqesë’, duke kanalizuar kërkesat e tyre.
Fermerët kanë pesë kërkesa për qeverinë, të konfirmuara edhe sot.
Gjithashtu ata kanë kërkuar një pagesë prej 50 mijë lekësh, në mënyrë që të mbjellin gjatë sezonit pranveror.
Në vendngjarje, gjatë kohës që zhvillohej protesta ndodheshin forcat e rendit të komisariatit të Lushnjes dhe ‘Shqiponjat’.
Në shenjë proteste, fermerët kanë derdhur arkat me domate në rrugë.
Ata kanë paralajmëruar, se nëse nuk i jepet zgjidhje problemeve të tyre, do të protestojnë përpara Ministrisë së Bujqësisë.
Kërkesat e fermerëve
1-) Mbështetje financiare direkte për fermerët duke na subvencionuar për cdo njësi produkti te hedhur ne treg kundrejt faturës tatimore të shitjes dhe stimulim te eksportuesve te cilet jane promotore te zhvillimit te bujqësisë.
2-) Vlerësim dhe kompesim financiar me cmim dysheme të tregut për produktet e humbura nga fatkeqsitë natyrore dhe stogun e produktit të shkaktuar nga crregullime të forta të tregut.
3-) Rregullim në paketen fiskale 2020 të shkallës së TVSH-së për sektorin e tregëtimit dhe përpunimit të produkteve bujqësore e blektorale sepse aplikimi i shkallëve të ndryshme të TVSH-së që sot është në mënyre paradoksale 0% në blerje dhe 20% në shitje dhe perfshirja e të ashtuquajturës normë kompesimi 6% në këtë mekanizëm i ka vënë operatorët e këtij sektori në një regjim taksimi të padrejtë dhe për pasojë i ka detyruar të furnizohen me produktet bujqësore nga importi dhe të braktisin produktin vëndas .
4-) Kërkojme nga Ministria e Bujqësisë të na garantojë shërbimin e ekstensionit me specialistët e Drejtorive Rajonale të Bujqësisë,laborator për analiza të tokës, garantim dhe monitorim të cilësisë së imputeve bujqësore , kontroll dhe monitorim të cilesisë së produkteve tona nëpërmjet një laboratori të akredituar.
5-) Kërkojmë nga qeveria të angazhohet në rregullimin me ligj të kushteve dhe mënyren e kryerjes së tregtisë me produktet bujqësore për të garantuar interesat e paleve në këtë treg.
