Deputeti i Partisë së Gjelbër në Gjermani, Manuel Sarrazin, ka kritikuar ashpër koalicionin qeverisës CDU/CSU, për shtimin e kushteve ndaj Shqipërisë, për hapjen e negociatave.
Sipas tij, si Shqipëria dhe Maqedonia e Veriut, i kanë plotësuar kushtet për të çelur negociatat, shkruan “Newsbomb”.
Më tej ai shton se dy partitë më të mëdha në Gjermani, po zvarrisin qëllimisht nisjen e bisedimeve për dy vendet e Ballkanit perëndimor.
Për Sarrazin kjo sjellje është e padrejtë dhe e padenjë për bashkëekzistencën evropiane.
Gjithashtu ai përsëriti vendimin e Partisë së Gjelbër për dhënien e dritës jeshile për Shqipërinë dhe Maqedoninë e Veriut.
“Ne, Të Gjelbrit, do ta miratojmë çeljen e negociatave të anëtarësimit të Maqedonisë së Veriut dhe Shqipërisë në BE. Ky vendim vjen i vonuar dhe u vonua vetëm për shkak të taktikës së zvarritjes të disa pjesëve të grupit parlamentar CDU/CSU. Të dy vendet i kanë përmbushur mjaftueshëm kushtet. BE-ja tani duhet të tregojë se është një partner i besueshëm dhe të hapë bisedimet e anëtarësimit në BE. Kushtet shtesë të formuluara nga koalicioni për Shqipërinë e tejkalojnë objektivin. Është e papranueshme që Shqipëria çdo vit të duhet të përmbushë kushte të reja për negociatat e anëtarësimit në BE. Kjo nuk është vetëm e padrejtë, por edhe e padenjë për një bashkëekzistencë evropiane”, u shpreh deputeti gjerman.
