Aktivistja dhe avokatja, Ardiana Kalaja denoncoi me video disa persona që fusnin brenda ministrisë së Brendshme, ndihmat për të prekurit nga tërmeti.
Ajo ka dhënë dëshminë sot në Policinë e Tiranës.
Kalaja është akuzuar nga policia për “Shpifje”, “Ndërhyrje në jetën private” dhe “Mosbindje ndaj forcave të rendit”.
Avokatja ka sqaruar për mediat dëshminë e dhënë në polici.
Sipas saj, policia nuk hetoi kurrë se përse ndihmat shkarkoheshin në ministrinë e Brendshme.
Kalaja ka hedhur poshtë pretendimet e policisë, duke thënë se as nuk ka shpifur dhe as nuk ka cënuar njeri në jetën private.
Më tej ajo shton se është ndjerë e dhunuar nga policia, e cila nuk ka paraqitur asnjë shkresë.
“Më bën përshtypje se policia e Tiranës ngre akuza ndaj një veprimi timin si një qytetar i këtij vendi që kur sheh një veprim të dyshimtë bën denoincimin përkatës. Në këto momente policia e Tiranës nuk ka marrë asnjë hap për të hetuar se pse këto ndihma po shkarkoheshin në Ministrinë e Brendshme. Nuk më rezulton që ne të kemi bërë as akuza as shpifje. Unë bëj një veprim qytetar, që mendoj se i shërbej policisë dhe nga ana tjetër policia nuk bën asnjë hetim se pse ato ndihma shkarkoheshin në Ministrinë e Brendshme. Unë do pres ecurinë e hetimeve për sa kohë që respektoj ligjin, kam besim tek drejtësia. Sepse po të shihni akuzën e parë dhe të dytë është qesharake sepse aty vetëm shpifje nuk ka. Aty ka një video që kërkon që të sqarohet nga policia. Akuza e dytë është ndërhyrje në jetën private, unë kam filmuar në ambiente publike dhe nuk kam cënuar njeri në jetën private. Herën e parë u sollën në mënyrë të njerzishme dhe herën e dytë u sollën me dhunë. Në asnjë moment nuk vijnë me një dokument zyrtar. Unë nuk mund të paraqitem për sa kohë që nuk ka një shkresë zyrtare, për tu paraqitur. Është një kaos total që policia nuk po di ti japë zgjidhje”, u shpreh Kalaja.
