Drejtori i Teatrit të Bylisit, Klajdi Marku, ka dhënë dorëheqjen pas investigimit të emisionit “Piranjat”, ku pranoi se kishte shkuar posaçërisht nga Shqipëria në një takim me kryeministrin Rama në Athinë.
Në fjalën e tij, Marku shpjegoi se dorëheqja erdhi si pasojë e këtij emisioni, duke treguar versionin e tij të ngjarjes. Ai tha se fillimisht ishin në Korinth për të dhënë një shfaqje më 11 maj, por më pas grupi i kishte kërkuar të ishin pjesë e takimit të kryeministrit me emigrantët në Athinë, dhe ai pranoi.
Gjithashtu, u raportua se dhjetëra autobusë, qindra makina private dhe disa fluturime të çarteruara nga Rinasi, të organizuara me ftesë të kryeministrit Rama dhe të paguara nga taksat e qytetarëve, shkuan në Athinë për këtë takim. Sidoqoftë, asnjë nga emigrantët nuk pati mundësinë të fliste gjatë ngjarjes.
