Gjykata Themelore në Prishtinë ka dënuar Florent Poroshticën me 21 muaj burgim dhe 5 mijë euro gjobë, për përfshirjen e tij në krijimin dhe menaxhimin e grupit kriminal të njohur si “Albkings”.
Në këtë seancë, gjykatësi Adnan Kamberi ka veçuar rastin e Edin Nevzati, i cili ka shpëtuar duke u arratisur në Serbi.
Kamberi ka theksuar se do të ndërmarrë masa për ta sjellë Nevzatin para drejtësisë. Seanca, që ishte planifikuar për 30 janar, u shty për shkak të mungesës së të dyshuarve.
Edin Nevzati kishte njoftuar avokatin në momentin e fundit se nuk do të paraqitej në gjykatë, ndërkohë që është konstatuar se ai ka ikur në një fshat të Serbisë.
Një nga viktimat e këtij grupi është Anisa Veseli, ish-banorja e Big Brother VIP Kosova 3, e cila ka pasur keqpërdorim të fotografive dhe të dhënave personale nga “Albkings”.
Prokuroria Themelore në Prishtinë kishte ngritur aktakuzë më 27 janar 2024 ndaj F.P., E.N., dhe E.S. lidhur me veprimtarinë e grupit “Albkings”.
Aktakuza u ngrit pas një hetimi të gjatë dhe të pandërprerë. Të akuzuarit përballen me akuzat për “Vjedhje të identitetit dhe kredencialeve në bashkëkryerje”, “Shantazh” dhe “Shtrëngim”. Ata kanë arritur marrëveshje me Prokurorinë për pranim fajësie.
Edin Nevzati, ish-administratori i “Albkings”, ishte arrestuar më 17 prill 2024 për vjedhjen e identiteteve dhe kredencialeve, por u lirua nga paraburgimi në tetor 2024.
