Ambasadorja amerikane Yuri Kim ka reaguar në lidhje me vendimin e apelit të GJKKO për të lënë në fuqi dënimin me dy vite burg për ish-kryeprokurorin Adriatik Llalla. Në një postim në Tëitter, Kim shkruan se prokurorët duhet të vazhdojnë të ndërmarrin veprime kundër zyrtarëve, të cilët përdorin pozitën e tyre për t’u pasuruar, pavarësisht sa të fuqishëm janë.
“Më vjen mirë që shikoj se drejtësia po punon kundër zyrtarëve të korruptuar. Prokurorët duhet të vazhdojnë të ndërmarrin veprime kundër zyrtarëve – pa marrë parasysh sa të lartë apo të fuqishëm – të cilët keqpërdorin pozitën e tyre për t’u pasuruar. Askush nuk është mbi ligjin”, shkruan Kim.
Kujtojmë që apeli i Gjykatës së Posaçme Kundër Korruspionit dhe Krimit të Organizuar la në fuqi vendimin e shkallës së parë të GJKKO-së për të dënuar Llallën me dy vite burg. Në vendim përfshihet 5 vite heqje të së drejtës për të ushtruar funksione publike si dhe konfiskim të pasurisë. Akuzat që rëndojnë mbi ish-kryeprokurorin janë “Refuzim për deklarim, mos deklarim, fshehje ose deklarim i pasurive, interesave privat të personave të zgjedhur dhe nëpunësve publik ose i çdo personi tjetër që ka detyrim ligjor për deklarim”. Adriatik Llalla nuk ishte i pranishëm në seancën e ditës së sotme, ndërsa avokati Sokol Hazizaj tha se nuk ishte në dijeni të vendndodhjes së ish-kryeprokurorit.
