Është marrë vendimi për mënyrën e zhvillimit të provimeve në Universitetin e Tiranës. Ditën e sotme rektori i UT, Artan Hoxha ka firmosur vendimin për mbajtjen online të provimeve. Ditën e sotme në mbledhjen e Komitetit Teknik të Ekspertëve, yv.ministrja e shëndetësisë Mira Rakacolli është shprehur se në bashkëpunim me Ministrinë e Arsimit po punohet për vlerësim të mundësive të rikthimit në auditore. Ndërkohë, në vendimin e publikuar sot se në pamundësi të zhvillimit të provimeve në auditore, do të shihen forma alternative të përmbylljes së tyre këtë semestër, në të kundërt ato do të mbahen më vonë brenda muajit qershor.
“Provimet të cilat nuk mund të zhvillohen online për shkak të specifikës së lëndës, me kërkesë të titullarit të lëndës dhe me miratim të përgjegjësit të njësisë bazë, do të zhvillohen në auditor vetëm pas marrjes së miratimit përfundimtar nga Komiteti i Ekspertëve. Në rast se Komiteti nuk miraton kërkesat e zhvillimit të provimeve për këto lëndë në auditor, titullarët e tyre të shohin mundësitë alternative të përmbylljes së procesit të provimeve në këtë semestër. Në pamundësi të realizimit të këtyre provimeve brenda këtij semestri si dhe për ata studentë që kanë mundësi të pjesëmarrjes në këtë semestër do të përcaktohet një periudhë e mëvonshme e zhvillimit të tyre brenda muajit qershor”, thuhet në deklaratën e publikuar nga Rektorati.
Më herët ka qarkulluar në rrjet një rregullore për mbajtjen e provimeve online, por nuk dihet ende nëse është ajo që Universiteti i Tiranës ka miratuar.
