Ditën e sotme menjëherë pas lajmit të publikuar në media ku bëhej me dije se ish deputeti i PS, Aqif Rakipi ishte sanksionuar nga Departamenti Amerikan i Shtetit, ka dhënë një deklaratë për mediat djali i tij Orlando Rakipi.
I gjendur në situatë të papritur Ornaldo Rakipi teksa po hynte në Kuvend si deputet i PS, ka deklaruar i prekur para mediave se ende nuk e dinte se për çfarë bëhej fjalë me anë të këtij lajmi. Ndërkohë mes të tjerave Rakipi tha se babai i tij ishte i pastër dhe shtoi se nëse vërtetoheshin akuzat ndaj tij, atëherë do jepte dorëheqjen nga mandati i deputetit.
Deputeti i PS, Orlando Rakipi: Jam pro amerikan dhe nuk e di se çfarë është ai vendim. Babai im është super i pastër, mund ta shihni nuk ka asnjë lloj rekordi kriminal apo çfarë flitet, nuk kemi lidhje tek ajo pjesë. Unë do jap dorëheqjen nëse vërtetohen këto akuza.
Njoftimi i DASH për Rakipin:
Aqif Rakipi (Rakipi) është një ish-deputet famëkeq nga Elbasani, Shqipëri, i cili ka ndikim të dëmshëm dhe destabilizues në proceset politike në Shqipëri. Grupe të shumta të krimit të organizuar (GKO) në Shqipëri kanë ofruar para, dhurata ose premtime për vende pune apo lëshime në këmbim të votave për partinë e tyre të preferuar politike. Rakipi ka qenë prej kohësh i përfshirë në krimin e organizuar dhe është i lidhur ngushtë me një Grup Krimi të Organizuar, brenda të cilit ai ka ushtruar ndikim politik, përfshirë edhe përmes korrupsionit.
Për shembull, Rakipi ka përdorur ndikimin e tij politik për të emëruar miqtë e tij në pozicione kyçe publike në Elbasan dhe Tiranë. Rakipi humbi mandatin e tij si deputet i parlamentit të Shqipërisë pasi prokurorët konfirmuan rolin e tij në veprimtari kriminale nën një pseudonim. Ai përcaktohet në bazë të E.O. 14033 sepse ka qenë përgjegjës ose bashkëpunëtor në ose për përfshirje të drejtpërdrejtë ose të tërthortë në korrupsion lidhur me Ballkanin Perëndimor, përfshi korrupsionin nga, në emër të, ose të lidhur me një qeveri në Ballkanin Perëndimor, apo një zyrtar aktual ose të kaluar qeverie, në çfarëdo niveli të qeverisjes në Ballkanin Perëndimor, siç është përvetësimi i pronave publike, shpronësimi i pronave private për përfitime personale ose qëllime politike, apo ryshfete.
