Drejtori i Përgjithshëm i Autoritetit Kombëtar të Ushqimit, Agron Hetoja, i ka shitur mbesës së tij një apartament me një çmim 100 mijë euro më shumë sesa e kishte blerë.
Siç shkruan “Boldnews”, Hetoja e ka deklaruar edhe në formularin e pasurisë, shitjen e apartamentit në 2018-ën.
Apartamenti me sipërfaqje 143.5 m2 është blerë nga kreu i AKU në vitin 2005, për 39 mijë dollarë.
Ai ndodhet pranë Arkivës së Shtetit, përballë Gjykatës së Krimeve të Rënda.
Hetoja rezulton se e ka blerë apartamentin me vlerë rreth 272 dollarë/m2, në një kohë kur çmimet në atë zonë ishin shumë më të larta.
Inspektoriati i Lartë i Kontrollit të Deklarimeve të Pasurive dhe Konfliktit të Interesave nuk konstatoi asnjë problematë në transaksion.
Mirëpo vitin e shkuar, Hetoja vendos të shesë apartamentin, po nuk deklaron qartësisht vlerën e tij, në formularin e dorëzuar pranë ILDKPI.
Në deklaratën e pasurisë ai ka shënuar:
“Shtim në llogarinë rrjedhëse në bankën “X”, si rrjedhojë e transaksioneve për kontrata shit-blerje pasurie të paluajtshme (Kontratë sipërmarrje datë 10.01.2018 dhe Kontratë Shitjeje, dt. 22.12.2018). Më datë 31.12.2017 gjendja në këtë llogari bankare ishte 30.000 euro. Ndërsa gjendja në fund të vitin 2018 është 171.000 euro”.
Nga verifikimet e “Boldnews”, rezulton se drejtori i AKU, ia ka shitur apartamentin mbesës së tij, L.Hetoja dhe bashkëshortit të saj, S.Doko.
Kontrata e shitjes është realizuar në 22 dhjetor në 2018-ës.
Nërkohë shtetasja L.Hetoja nuk rezulton të ketë një biznes në emër të saj, ndërsa S.Doko është 50% bashkëpronar dhe administrator i një kompanie private.
Në faqen zyrtare të Qendrës Kombëtare të Biznesit, rezulton i depozituar vetëm një blanc vjetor për 2010-ën, me fitim prej 1.2 milion lekë të reja.
Këto janë të dhënat e vetme për këtë kompani.
