Dy vëllezërit shqiptarë Trushi u bënë të famshëm në Itali për aktivitetin e tyre kriminal. Ata vidhnin sende me vlerë që nga orët e dorës e deri te shtëpitë dhe automjetet.
Por gjithçka mori fund në vitin 2015, kur në një Benz të vjedhur karabinierët gjetën një bisht cigareje.
U duk sikur gjithçka u zgjidh. Por pasi u bënë analizat, u thirr i pandehur Eduard Trushi, në atë kohë 30-vjeç, i cili u paraqit në gjyq me binjakun Edmond.
Në gjyq “u buzëqeshi fati”, pasi autoritetet e kanë të pamundur të përcaktojnë se cili prej të dyve e ka bërë krimin.
Ata kanë të njëjtin model flokësh, të njëjta tatuazhe, të njëjtin trup, ADN thuajse të njëjtë sepse janë binjakë homozigotë.
Ndërkohë të mërkurën, gjyqtarja Laura Donati u detyrua ta lirojë Eduard Trushin sepse megjithëse janë bërë shumë analiza, nuk mund të përcaktohet nëse ishte ai apo vëllai që ka kryer grabitjen. Por edhe Edmondi nuk mund të burgoset, pasi ka mungesë provash.
Gjithsesi, edhe pse mund të kenë shpëtuar nga dënimi me burg, më herët mediat italiane kanë shkruar se dy shqiptarët do të dëbohen nga Italia.
