Furnizimet e para të vaksinës Covid nën programin ndërkombëtar Covax arritën këtë mëngjes në Malin e Zi dhe Maqedoninë e Veriut. Siç raportohet nga media rajonale, në të dy vendet e Ballkanit kanë mbërritur 24,000 doza të vaksinës AstraZeneca, me të cilat do të jetë e mundur të fillohet plani i imunizimit duke filluar me grupet e popullsisë më të rrezikuara, të moshuarit dhe mjekët, shkruan ANSA.
Ditët e fundit, një grup i parë i vaksinave Covax – 23,400 doza Pfizer-BioNTech – kishte mbërritur gjithashtu në Bosnjë-Hercegovinë. Për më tepër, 30,000 doza të vaksinës kineze Sinovac të dhuruara nga Turqia mbërritën sot në Sarajevë. Mali i Zi, Maqedonia e Veriut dhe Bosnjë-Hercegovina kanë marrë në javët e fundit disa mijëra doza vaksine të dhuruara nga Serbia, i vetmi vend në Ballkanin Perëndimor (me përjashtim të Sllovenisë dhe Kroacisë që janë anëtare të BE) që ka qenë në gjendje të nisë me sukses vaksinimi masiv falë kontratave bilaterale të lidhura me prodhuesit.
Në Serbi – e cila gjithashtu do të sigurojë furnizime Covax – administrohen katër lloje të vaksinave – kryesisht kineze dhe ruse Sputnik V e Sinopharm, si dhe AstraZeneca dhe Pfizer-BioNTech. Nga një popullsi prej 7 milion banorësh, më shumë se 2.2 milion morën dozën e parë dhe me këtë vendi është ndër të parët në Evropë për vaksinat e kryera në lidhje me popullsinë. Falë kësaj disponueshmërie vaksinash, Serbia ka organizuar një vaksinim për qytetarët e vendeve fqinje këtë fundjavë.
