Përveç të tjerave, mbërritja e COVID-19 në vendin tonë na tregoi se sa të papërgjegjshëm dhe me komplekse janë shqiptarët.
Frekuentimi masiv i vendeve publike një ditë pasi Coronavirusi kishte prekur vendin tonë bëri që qeveria të urdhëronte mbylljen e lokaleve, restoranteve e të gjitha vendeve publike.
Po ashtu, nga mëngjesi i ditës së sotme e deri të dielën ka nisur ‘shtetrrethimi’, ku përsëri shqiptarët u treguan të pabindur duke shëtitur me makinat private nëpër qytete të ndryshme.
Së fundmi, disa të rinj nga Astiri kanë tregur shpirtin e tyre festiv , pavarësisht se në vendin tonë prej 5 ditësh qarkullon virusi që ka trembur të gjithë botën.
Zjarri ka tërhequr vëmendjen e banorëve të tjerë në lagje të cilët kanë nisur të filmojnë flakët, duke treguar papërgjegjshmërin e tyre ku ndonëse autoritetet bëjnë thirrje të shmangim grumbullimet janë bashkuar të festojnë duke rrezikuar të gjithë komunitetin.
Kujtojmë se ndezja e zjarrit është karakteristikë e festimeve të ‘Ditës së Verës’ dhe simbolizon largimin e së keqes dhe ardhjen e një vere plot diell e begati.
Në këtë ditë në qytetet të ndryshme organizohen koncerte e organizime të shumta, të cilat këtë vit u anuluan për shkak të prekjes së Shqipërisë nga Coronavirusi.
Ky virus në vendin tonë deri tani ka prekur 33 persona dhe ka vrarë një 73-vjeçare nga qyteti i Durrësit.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
