Çmimet e shportës bazike të ushqimeve janë shumë të larta dhe të papërballueshme për qytetarët.
Kujtojmë që të dhënat e detajuara të INSTAT, tregojnë se shtrenjtimi ka qenë shumë i lartë për disa produkte të domosdoshme. Çmimet e bukës dhe drithërave u rritën mesatarisht me 15.8% në krahasim me marsin e një viti më parë. Një bukë masive tashmë kushton 120 lekë, nga 80 lekë më parë. Bulmeti u rrit me 12% ndërsa Vaji bimor u shtrenjtua ndjeshëm në mars, duke i kaluar 300-320 lekë.
Qytetarët janë pyetur nga “News 24” dhe janë shprehur se kjo rritje është e papërballueshme për xhepat dhe ekonominë familjare. Ata që duket se e vuajnë më shumë janë pensionistët, të cilët edhe njëherë i bëjnë thirrje qeverisë të mendojë për ta.
Gjithashtu qytetarët ndanë opinione edhe për punën e bordit të transparencës, i ngritur për të kontrolluar çmimet e artikujve jetikë dhe për te shmangur abuzimet.
“Bordi po bën një pune shume te keqe, nuk e ndiejmë fare ndryshimin”,-u shpreh një pensionist për ‘News 24’.
Ekspertet e ekonomisë thonë se rritja e çmimeve në vendin tonë është reflektim i rritjes së çmimeve në nivel ndërkombëtar, i rritjes së çmimeve të karburanteve apo dhe i mungesës së furnizimit nga zonat e luftës, siç janë Rusia dhe Ukraina.
