Nga Irena Beqiraj
Mesazh për mazhorancën!
Nuk duheshin 16 mijë faqe! 10 faqe do të mjaftonin për të detyruar mazhorancën që të mos mbytet me turp në detit e drejtësisë që premtoi se ishte e vendosur ti hynte në këmbë ! 10 faqe do të mjaftonin që të kuptonit, se vjen një moment se nuk mund të fshihni më kokën si struci në gropën e mashtrimeve, ndërkohë mosveprimi shpërndan në çdo qelizë së të majtës farën e kalbëzimit.
Ju të gjithë e dinit se do të përfundonte në katastrofë. Ju e dinit se ai ishte tmerrësisht i pakualifikuar dhe thellësisht i paqëndrueshëm. Ju e dinin se atij nuk i interesonte asnjë minutë askush edhe asgjë përveç vetes.
Megjithatë, çfarë vazhdoni pa shpëtim të bëni ? Asgjë.
Asnjë nga ju nuk sfidon, nuk këmbëngul për të vërtetën, nuk refuzon të bindet.
Jo, ju vazhdoni të merreni vesh; miratoni politikat e tij; kënaqeni me fantazitë e tij, pranoni gënjeshtrat e tij.
Edhe pse doni të besoni se përfaqësoni popullin, edhe pse supozohet të mbroni dhe ruani institucionet e shtetit, edhe pse keni pozicione me ndikim të konsiderueshëm, ju refuzoni ti përdorni ato. Ju bindeni si skllevër të poshtëruar në vend që të udhëhiqni.
Çfarë jete të përçudnuar bëni brenda politikës? Jeni ngjitur në politikë, për të ushtruar pushtetin që mundeni dhe serisht keni kaq shumë frikë, më keq se një pulat e rrjepura për së gjalli?!
Në 13 vjet u trajnuat për të optimizuar metrikat, iluzionin e arritjes, duke kalbur karakterin. Ju mësuat si të fitoni zgjedhjet, si të risni vizibilitetin , si të maksimizoni përfitimet , ndaj të respektoni parimet u duket tepër e kushtueshme.
