UASHINGTON
Presidenti amerikan Donald Trump është shoqëruar jashtë sallës ku ishte duke mbajtur konferencë për mediat, pasi pranë Shtëpisë së Bardhë u dëgjuan të shtëna me armë zjarri.
Trump u largua, pasi u shoqërua nga një agjent i Shërbimit Sekret. Agjenti ka dalë në skenë, ndëra kreu i Shtëpisë së Bardhë ishte duke folur, raportojnë mediat në gjuhën angleze.
Ndërsa, agjenti po merrte Trumpin, ky i fundit është dëgjuar të thotë “Oh” dhe “Cfarë po ndodh?”. Shtëpia e Bardhë u izolua, për shkak të incidenteve të së hënës.
Presidenti Donald Trump u kthye 9 minuta më vonë, duke thënë se situata tashmë ishte nën kontroll, e se një njeri ishte qëlluar jashtë Shtëpisë së Bardhë. Trump tha se Shërbimi Sekret ka qëlluar një person, që ishte i armatosur.
Shërbimi Sekret Amerikan e ka konfirmuar këtë incident. “Një burrë u qëllua nga një oficer i Shërbimit Sekret më 10 gusht jashtë rrethojave të Shtëpisë së Bardhë pasi ai iu afrua oficerit dhe i tha që kishte një armë”, tha Shërbimi Sekret. Burri, një 51 vjecar u godit në kraharor.
Që prej nisjes së protestave të fundit, siguria në Shtëpinë e Bardhë është shtuar. Trump, që kërkon të rizgjidhet president, tha se “të shtënat nuk kanë asnjë lidhje me të”. “Agjentët e sigurisë janë shumë të mirë. Ata janë më të mirët e më të mirëve”, deklaroi Trump.
