Që prej datës 9 shtator 2021, ku kreu i partisë Demokratike, Lulzim Basha pezulloi për ta përjashtuar më vonë nga grupi parlamentar i partisë ish-kryeministrin Sali Berisha, ky i fundit ka qenë në çdo dalje publike në “aksion” me akuzat.
Në çdo dalje të Berishës nuk kanë munguar sulmet ndaj Bashës, ku kujtojmë se janë zhvilluar disa protesta të organizuara nga ish-kryeministri me qëllim largimin nga detyra të kreut aktual të Partisë Demokratike.
Ndërkohë që ditën e sotme, pas disa muajsh, Berisha në një prononcim të tijin për mediat nuk e sulmon Bashën, ndryshe nga herët e tjera.
Ish-kryeministri u pyet disa herë për situatën në PD, si edhe debatet për një dorëheqje të kreut të PD, Lulzim Basha.
Ndërsa kërkoi që prononcimin t’ia dedikojë TAP-it, Berisha u kërkoi mediave të mos e ngatërrojnë atë me Bashën, por zbuloi shkurtimisht se po merret intensivisht me bashkimin e PD-së.
“Po flas për një projekt të shekullit. Mos ta ngatërrojmë atë me projektin e shekullit. Më bëni pyetje për TAP-in për të tjerat kur të doni. Një gjë mund t’ju them, po merrem me intensitetin më të madh për bashkimin e PD-së’ u shpreh Berisha.
Kujtojmë që Basha pas humbjes në zgjedhjet e pjesshme vendore te “6 Marsit” u shpreh se po reflekton.
““Unë jam gati të bëj çdo gjë në interesin më të mirë mirë të PD-së, por nuk duhet të paragjykojmë. Ne kemi mbledhur grupin e deputeteve, të nesërmen kolegjin e kryetarëve do të mbledhim edhe kryesinë. Jemi në proces reflektimi të brendshëm pas të cilit pa diskutim do të marrim përgjegjësi duke nisur nga unë i pari”, u shpreh Lulzim Basha dy ditë pas zgjedhjeve të pjeshsme vendore, të cilat I humbi.
