Ditën e sotme Shqipëria firmosi marrëveshjen për blerjen e dronëve ‘Bayraktar’ nga Turqia. Vendi ynë do të marrë fillimisht 3 dronë të armatosur TB2, ndërsa flota do të plotësohet vitin 2023.
Gjithashtu bëhet e ditur se Drejtori i Përgjithshëm i Policisë turke Mehmet Aktaş, ka vizituar sot Policinë e Shtetit, duke dhuruar një donacion që përfshin servera dhe pajisje për integrimin e disa prej programeve për ruajtjen e të dhënave zyrtare, akt ky që vjen pas sulmeve kibernetike të ndërmarra ndaj vendit tonë.
Fillimisht, z. Aktaş është pritur në një takim nga Drejtori i Përgjithshëm i Policisë Muhamet Rrumbullaku dhe më pas të dyja delegacionet zhvilluan një takim pune për forcimin e bashkëpunimit dhe ndërtimin e urave të reja në fushat me interes të përbashkët.
Ata vlerësuan marrëdhëniet midis dy policive në bashkëpunimet e kryera ndër vite.
Nga ana tjetër kujtojmë deklaratat e kryeministrit Rama i cili thotë se renditemi të 8 në Europë për shërbimet online, po pse turqit vazhdojnë dhe na ndihmojnë akoma?!
Dhe a i duhen vërtet Shqipërisë dronët? Hapësira ajrore mbrohet nga forcat ajrore italiane dhe greke. A do të përdoren dronët kundër peshqve në det? apo ariu në male?
Ndërkohë mos të harrojmë se Shqipëria vazhdon e bën blerje të panevojshme e pret ndihma nga jashtë…po çfarë do na dhurojë më tepër Turqia?
Njoftimi i Policisë:
Drejtori i Përgjithshëm i Policisë turke Mehmet Aktaş, vizitë në Policinë e Shtetit.
Policia turke i dhuron Policisë shqiptare, një donacion që përfshin servera dhe pajisje për integrimin e disa prej programeve të Policisë së Shtetit dhe ruajtjen e të dhënave të tyre.
Gjatë ditës së sotme, Drejtori i Përgjithshëm i Policisë turke Mehmet Aktaş, së bashku me delegacionin që e shoqëronte, ka zhvilluar një vizitë pune në Policinë e Shtetit.
Fillimisht, z. Aktaş është pritur në një takim “kokë më kokë” nga Drejtori i Përgjithshëm i Policisë shqiptare Drejtues Madhor Muhamet Rrumbullaku dhe më pas të dyja delegacionet zhvilluan një takim pune për forcimin e bashkëpunimit dhe ndërtimin e urave të reja në fushat me interes të përbashkët.
Të dy drejtorët e përgjithshëm vlerësuan marrëdhëniet mes dy policive, shkëmbimin e informacioneve për grupe dhe persona me aktivitet kriminal në fushën e krimit të organizuar, si dhe zhvillimin e operacioneve të përbashkëta për kapjen e personave të shumëkërkuar.
Drejtori i Përgjithshëm i Policisë së Shtetit e njohu drejtorin e Policisë turke, me prioritetet, filozofinë dhe vendosmërinë që ai ka për reformat strukturore, ligjore dhe arsimore të Policisë së Shtetit, me qëllim vendosjen e një standardi të ri në raport me qytetarët dhe zgjidhjen e problemeve të adresuara prej tyre sipas kompetencave që ligji i jep punonjësve të Policisë; për një qasje të re në luftën ndaj krimit dhe për vendosmërinë për të bashkëpunuar ngushtësisht me partnerët, në përmbushjen e misionit të përbashkët.
Fjala e Drejtorit të Përgjithshëm të Policisë së Shtetit: “Dua të falenderoj Drejtorin e Përgjithshëm të Policisë turke dhe ambasadorin e Turqisë, në Shqipëri, për ndihmën dhe kontributin e dhënë përmes donacioneve konkrete, në luftën ndaj sulmeve kibernetike, të cilat përgjatë muajit shtator, 2022, përfshinë sistemet teknologjike të Policisë së Shtetit shqiptar, si dhe për rritjen e sigurisë kibernetike në përgjithësi. Kjo ndihmë vjen në kuadër të bashkëpunimit intensiv me Policinë turke, bashkëpunim i cili e tejkalon nivelin protokollar dhe ka dimensionet e një miqësie të vërtetë dhe ndihme vëllazërore, në funksion të qëllimeve tona të përbashkëta. Ura e bashkëpunimit ndërmjet policive tona karakterizohet nga gatishmëria dhe reagimi në kohë ndaj çdo sfide të përbashkët. Ky fakt na inkurajon për të ardhmen, për ta thelluar më tej bashkëpunimin për çeshtje konkrete si lufta kundër krimit të organizuar, terrorizmit, si dhe për rritjen e kapaciteteve trajnuese të policive të të dy vendeve. Policia e Shtetit shqiptar ju garanton se është e angazhuar për të qenë për kolegët tanë të Policisë turke, partnere e besueshme, tepër transparente dhe shumë bashkëpunuese në luftën tonë të përbashkët, kundër krimit të organizuar, pastrimit të parave dhe terrorizmit.”
