Urdhri i Stomatologut vendosi një rritje çmimesh në madhësi të ndryshme për disa nga shërbimet bazë stomatologjike në mbledhjen e Asamblesë Kombëtare që u mbajt.
Nëse vizitat me sy të lirë ishin më parë falas në disa klinika stomatologjike, tani e tutje do të kushtojnë detyrimisht 500 lekë ose më shumë. Mbushjet e gradës së dytë, që më parë kapnin vlerën e 2,000 lekëve, tani do të kushtojnë të paktën 4,000; mbushjet e gradës së tretë, nga rreth 3,000 lekë do të kushtojnë minimalisht 5,000 lekë.
Po kështu rriten edhe çmimet e pastrimit të gurëzave dhe heqjes së dhëmbëve. Referojuni dokumentit në fund, siguruar nga Monitor.
Monitor kontaktoi me Urdhrin e Stomatologut për të zbuluar si u vendos kjo rritje e çmimeve. Përfaqësuesit thanë se u mor në konsideratë një mesatare e një kampioni klinikash ku u kërkuan lista çmimesh dhe u llogarit një mesatare për të nxjerrë çmimet referencë.
Çmimet e shërbimeve që nuk listohen mund të vendosen nga vetë stomatologët.
Sigurisht, kjo rritje çmimesh nuk është aspak lajm i mirë për shqiptarët, 50% e të cilëve kanë thënë në Anketën e Cilësisë së Jetës se nuk kanë shkuar te dentisti për të kursyer para; 34% kanë vonuar vizitën, ndërsa 16% nuk kanë shkuar fare për të marrë ndihmën e nevojshme.
