Gjykata Kushtetuese ngriti disa pyetje kur rrëzoi një nen të Kodit Zgjedhor, ku ishte përcaktuar formula se si një deputet e fiton mandatin e tij.
Shfuqizimi i herësit mund të ndryshonte tërësisht përbërjen e parlamentit, por ngelet e paqartë nëse ky vendim do të ndikojë tek zgjedhjet e 25 prillit.
“Sot nuk e them dot këtë, do të duhet të shikojmë arsyetimin e vendimit dhe ajo që vlen më shumë të të presim kur ky vendim të hyjë në fuqi”, është shprehur fillimisht kreu i KQZ, Ilirjan Celibashi.
Por pse rezultati i zgjedhjeve të 25 prillit ende nuk është përfundimtar?
“Do të duhet që formalisht Komisioni Rregullator të shpalli rezultatin në mënyrë përfundimtare, zyrtar. Në kuptim të shpërndarjes së mandateve kush janë kandidatët fitues dhe numrit të votave që ka marrë çdo subjekt zgjedhor nuk ndryshon asgjë kjo është përfundimtare, duke marrë në konsideratë takimet e fundit që janë bërë shpresoj që fundi i javës tjetër do të ketë vendim përfundimtar”, tha mes të tjerash Celibashi.
Ndërkohë në muajin shtator, në zbatim të Kodit Zgjedhor, KQZ do të rinumërojë 10 % të kutive të votimit për çdo qark, për të parë nëse ka pasur abuzime në numërim, të cilat do të çonin në ndjekje penale numëruesit.
