Detaje të reja dalin në dritë nga vrasja e dibranit Can Kariçi. Referuar kamerave të sigurisë, rezulton se Can Kariçi është qëlluar menjëherë sapo ai ka dalë nga lokali dhe ka hipur në automjetin e tij.
Në kamera është fiksuar edhe momenti kur makina tip “Audi” me të cilin lëviznin autorët afrohet pranë makinës së viktimës, dhe aty fillojnë ta qëllojnë, ku si pasoja 30-vjeçari Can Kariçi mori 4 plumba.
Grupi hetimor ka rindërtuar dinamikën se si u ekzekutua 30 vjeçari me origjinë nga Dibra e banues në Kamëz. Sipas kësaj, mësohet se i riu sapo doli nga lokali, hipi në makinën Golf me targa gjermane dhe sapo ndezi makinën e ti, 30 vjeçari u qëllua me breshëri kallashnikovi.
Nga vendi ku autorët hapën zjarr, kamerat kanë fiksuar se për gati 100 metra, Can Kariçi ka lëvizur me makinë i plagosur. Ai ndërroi jetë teksa ndodhej në makinë, ndërsa trupi i pajetë u diktua nga kalimtarët e zonës. Hetimet kanë zbuluar se ai i ishte drejtuar zonës së Institutit, aty ku e priste një tjetër vajzë për takim.
Bëhet e ditur se kjo e fundit kishte shkuar në këtë zonë me taksi dhe me mesazhe i kishte treguar Kariçit vendin se ku po e priste.
