Sekretari britanik për Çështjet e Jashtme, David Cameron, ka ndërprerë papritur vizitën e tij në Shqipëri. Ai ishte në Tiranë për një seri takimesh, përfshirë një konferencë të përbashkët me kryeministrin shqiptar, Edi Rama. Megjithatë, menjëherë pas këtyre takimeve, Cameron u nis drejt aeroportit të Rinasit dhe u largua nga Shqipëria brenda pak minutash, pa zhvilluar takimet e tjera të planifikuara me Presidentin e Republikës, Bajram Begaj, dhe drejtuesin e SPAK, Altin Dumani.
Ndërprerja e vizitës së Cameron erdhi pas njoftimeve të rëndësishme nga Londra, ku mediat britanike raportuan për zhvillime të ndjeshme politike. Kryeministri Rishi Sunak kishte thirrur një mbledhje urgjente të kabinetit qeveritar për atë pasdite, me spekulime në rritje se mund të njoftojë datën për zgjedhjet e parakohshme parlamentare. Pritet që Sunak të shpallë zgjedhjet gjatë muajve të verës, sipas raportimeve të The Independent, të cilat përfshinin edhe ndërprerjen e vizitës së Cameron në Tiranë.
Ndërkohë, Sekretari i Mbrojtjes, Grant Shapps, gjithashtu ka shtyrë një fluturim për të marrë pjesë në një takim të NATO-s në shtetet baltike. Rishi Sunak, i cili është nën presionin e vazhdueshëm për të shpallur zgjedhje, duket se po përgatitet për një garë zgjedhore gjatë verës, dhe kjo ka nxitur thashethemet në Westminster për një zgjedhje të afërt.
