Pas mbarimit të mbledhjes së Këshillit Politik, që nisi që prej orës 17:30 (pas dakordësisë së palëve për t’u ulur në tryezë për paketën e ligjeve), përfaqësuesit e Opozitës Jashtëparlamentare në Këshillin Politik, Oerd Bylykbashi dhe Petrit Vasili dolën në një deklaratë për shtyp.
Bylykbashi dhe Petriti u shprehën të gatshëm për diskutimin edhe të ndryshimeve kushtetuese, por thanë se ky diskutim nuk mund të kryhet brenda 6 ditësh, pasi vetëm për Kodin Zgjedhor iu deshën 6 muaj.
Më tej Vasili tha se propozimet për ndyshimet kushtetuese janë dorëzuar para dy ditësh, ndërsa ky diskutim është i imponuar për 6 ditë, deri në ditën që do të votohet në parlament.
Ndërkohë Bylykbashi tha se kërkojmë që të mos bëhen veprime të njëanshme, pasi dëmtojnë dhe nxjerrin nga shinat marrëveshjen e 5 qershorit.
Oerd Bylykbashi:
Opozita zbatoi atë pjesë tjetër të marrëveshjes së 5 Qershorit, çështjen e shitblerjes së votës, dhe presionin apo abuzimin e administratës, një tjetër çështje që duhet miratuar pa ndryshime në Kuvend. Sigurisht kjo nuk e mbyll marrëveshjen e 5 Qershorit, sepse është edhe çështja e depolitizimit të administratës zgjedhore. Është një çështje që Këshilli Politik duhet ta përmbushë. Ajo që ne bëmë të qartë është se çdo veprim i njëanshëm, minon dhe nxjerr nga shinat marrëveshjen e 5 Qershorit.
Petrit Vasili:
Siç e keni ndjekur nga të gjithë deklarimet e partnerëve ndërkombëtarë një nga çështjet ka qenë edhe ndryshimet kushtetuese. Propozimi fakt i kryer është dorëzuar vetëm para 2 ditësh dhe ky diskutim është imponuar që të kryhet brenda 6 ditësh. Kërkohet që kushtetuta e vendit dhe ndryshimi i sistemit zgjedhor të bëhet për 6 ditë kur për kodin na u deshën 6 muaj. Jemi shprehur që Këshilli Politik të diskutojë gjithçka, por jo brenda 6 ditëve. Këshilli Politik dhe opozita në Këshill mbetet e palëkundur në vullnetin për të diskutuar çdo çështje, por pa llogjikën e imponimit dhe pasi të ketë mbaruar 5 qershori.
