Buxheti për vitin e ardhshëm 2024 është planifikuar, duke e ndarë ‘tortën’ e parave në funksion të xhepave të pushtetarëve. Deputetja e PD-së Jorida Tabaku ka komentuar projekt-buxhetin e vitit të ardhëm teksa akuzon qeverinë për rritje të taksave të qytetarëve në favor të oligarkëve.
Me anë të një postimi në rrjetet sociale, Tabaku thekson se buxheti i planifikuar adreson 195 milion euro te arbitrazhi dhe PPP-të korruptive ‘kullufitin’145 milion, ku të gjitha janë në hetim nga SPAK-u.
Pra, buxhet i ri por filozofi e vjetër, me qëllimin për të pasuruar akoma më shumë oligarkët.
“Besoj të gjithë i keni dëgjuar shifrat stratosferike që po prezantohen me buxhetin tashmë. Asnjë lidhje me realitetin e xhepave të qytetarëve shqiptarë. Dy gjëra ka buxheti: Rritjen e përgjithshme të taksave me 70 mln euro, i njëjti avaz socialist i 10 viteve të fundit; dhe e dyta, ka një rritje të përgjithshme të çmimeve që reflektohet me më shumë të ardhura në buxhetin e shtetit. Nga pikëpamja e shpenzimeve, a do të sjellë gjë në xhepat e qytetarëve shqiptarë? 9% më pak fonde bujqësia, 195 milion euro arbitrazhi, PPP-të korruptive, 145 milion euro që janë të gjitha në hetim nga SPAK-u. Si përfundim, avazi i 10 viteve të shkuara, e njëjta filozofi, asnjë sektor që ka mbështetje kryesore, asgjë për qytetarët shqiptarë në fund të ditës!”, shkruan Tabaku.
