Në aeroportin e Rinasit kanë mbërritur 192 mijë dozat e para të vaksinës kineze të Sinovac. Për të pritur vaksinat ka qenë vetë kryeministri Edi Rama i cili ka thënë se brenda 60 ditësh në vend do të vijnë 1.2 milionë doza të tjera. Rama ka thënë se synimi është që brenda qershorit të jetë vaksinuar gjysma e popullsisë. Kryeministri deklaroi se numri i vaksinave aktualisht në Shqipëri është në total 282 mijë, ndërsa më vonë do të vijnë 70 mijë doza të Pfizer, 80 mijë të AstraZeneca dhe 25 mijë të Sputnik V.
“Brenda 60 ditësh, ne do të kemi 1.2 milionë doza plus. Gjë që na mundëson, që menjëherë të shtrijmë vaksinimin në të gjithë territorin në bazë të planit që kemi përgatitur. Ambicia jonë është që deri në fund të muajit qershor, por duam brenda majit, të kemi vaksinuar gjysmë milioni qytetarë. Kemi vendosur vijën e objektivit tek afati i deri brenda qershorit. Sot që flasim në Republikën e Shqipërisë, ne kemi aktualisht 282 mijë vaksina + vaksinave që sapo mbërritën, kemi edhe vaksinat Astra Zeneca, Pfizer dhe Sputnik. Ne ndërkohë presim që këtyre vaksinave t’iu shtohen dhe 70 mijë Pfizer, 80 mijë Astra Zeneca, dhe 25 mijë vaksina të tjera Sputnik. Duke i bashkuar me 106 mijë vaksinat që janë në process me BE, bëjnë në total 871 mijë vaksina së bashku me shumën e kontraktuar aktualisht të gjysmë milioni që thashë më parë. Ne faktikisht, kemi të kontraktuara 500 mijnë vaksina Sinovax dhe kemi siguar 1 milionë. Kemi marrë në fillim aq për të parë. 500 mijë Pfizer po ashtu janë të kontraktuara. Janë mbi 1 milionë të tjera të parapaguara me Covax. Ne shkojmë në 2.640.000 të siguruara në këto momente që flasim. Gjendemi në një pozicion strategjik për të realizuar së pari objektivin më të afërm, lehtesimi i sezonit turistik”, tha Rama.
Ndër të tjera kryeministri deklaroi se janë nisur bisedimet për të sjellë në Shqipëri fabrikën e prodhimit të vaksinave.
“Njëkohësisht kemi nisur bisedat për të sjellë në Shqipëri fabrikën për prodhimin e vaksinave. Një fabrikë të teknologjisë të lartë, e cila aktualisht është një nga kompanitë e mëdha në botë. Kompania farmaceutike që bën distribucionin e fabrikës Sinovac”, ka thënë Rama.
