Këshilli i Ministrave ka zhvilluar mbledhjen e radhës edhe pse kryeministri Edi Rama ndodhet në Londër, ku po merr pjesë në Samitin e NATO-s.
Mbledhja u drejtua nga zv.kryeministri Erion Braçe, i cili i bëri thirrje kabinetit qeveritar, që të bëhet zëvendësimi me urgjencë i çadrave aktuale, me çadra dimërore.
Ndër të tjera ai kërkoi që njërzit brenda muajit të zhvendosen nga hotelet në shtëpi me qira.
Braçe shtoi më tej, se Laçi dhe Lezha duhet të kthehen në prioritet, për shkak të panikut që është përhapur atje.
“Gjithë vëmendja duhet të përqendrohet te zonat rurale apo periferitë, ku njerëzit kanë preferuar të qëndrojnë pranë zonave të tyre. Duhet të bëhet zëvendësimi i çadrave menjëherë, që të jenë çadra dimërore. Duhet të përshpejtojmë gjetjen e banesave me qira. Kruja, Vora, e kanë të pamundur të gjejnë vetë banesa me qira, do duhet t’i akomodojmë ne në Tiranë. Duhet të bëjmë zhvendosjen brenda këtij muaji dhe strehimin e këtyre personave nga hotelet në shtëpi me qira. Do duhet të mbyllim procesin, Laçi dhe Lezha duhen kthyer në prioritet, për shkak të panikut të përhapur atje, por edhe për shkak të faktit se duhet të nisim programin se ç’do bëhet me ata njerëz”, tha Braçe.
