Mbledhja e Këshillit të Ministrave ditën e sotme, u drejtua nga zv.kryeministri Erion Braçe.
Ky i fundit ka kërkuar që zyrtarët të cilët kanë firmosur katet shtesë, të mbajnë përgjegjësi.
Ndër të tjera Braçëe kërkoi që të merret një vendim teknik për shtesat që rrezikojnë pallatet.
Zv.kryeministri tha se ndryshe nga Durrësi në Tiranë nuk ka marrë përgjegjësi asnjë nga ndërtuesit.
Më tej Braçe solli shqetësimet e disa banorëve në Tiranë, të cilët ankohen se në garazhet e pallateve ku banojnë janë sharruar kolonat.
“Çdo të bëhet me shtesat me leje apo pa leje mbi pallatet para viteve 1990? Për mendimin tim aq sa kam parë, ata që janë bërë me leje sipas ekspertëve rrezikojnë strukturën e pallatit që sot është në rregull, por rrezikon më tutje, ata zyrtarë që kanë këto gjëra duhet të mbajnë përgjegjësi. Atje ku janë pa leje po prapë të mbajnë ata që i kanë bërë. Duhet marrë një vendim teknik se çfarë do të bëhet me shtesat mbi lejet e ndërtimit që rrezikojnë pallatet. Gjatë fazës së kontrollit duhet të kemi parasysh edhe këtë fakt. Mua më duket sporadike paraqitja e aq ndërtuesve, ndërsa në Durrës janë paraqitur aq sa thatë ju, në Tiranë nuk është paraqitur asnjë. Askush nga ndërtuesit nuk kanë marrë përgjegjësi. Procesi në Tiranë duhet të vihet nën kontroll dhe të mos lejohen qytetarët të kryejnë punime që nuk janë të certifikuara. Këtu në Tiranë unë kam marrë një seri shqetësimesh, shqetësime me atë që nuk duken, kryesisht me garazhe, ku janë sharruar kolona. Janë raste sporadike, por ne duhet t’u përgjigjemi së bashku me ata që janë përgjegjës, pra me ndërtuesit. Nuk kanë përmasën e Durrësit as në sasi, por as në përmasën e dëmit. Duhet t’u japim garanci njerëzve” tha Braçe.
