Ditën e sotme Deputeti i Partisë Socialiste, Erion Braçe ka depozituar në Kuvend një propozim për ndryshime ligjore në fushën e bujqësisë. Braçe kërkon ndryshime për “Pagesat e Vonuara në detyrimet Kontraktore dhe Tregtare”, ku prodhuesit bujqësor tashmë do të kenë të njëjtin trajtim për pagesat e vonuara si edhe tregtarët e fushave të tjera.
Projektligji i depozituar në sekretarinë e Kuvendit të Shqipërisë në datën 13 qershor 2022 parashikon ndryshime ligjore në nenin 1, nenin 3 dhe nenin 4, ku Braçe kërkon që pas togëfjalëshit “Shoqëri tregtare”, të shtohet togfjalësh ose/edhe “Prodhuesve Bujqësor”.
Aty sqarohet se këto ndryshime ligjore vijnë për shkak se nga mos shlyerja në kohë e detyrimeve për prodhuesit bujqësore, krijon jo vetëm një zinxhir të vonesave në pagesa, por ndikon drejtpërsëdrejti në ngadalësimin e aktivitetit në sezonet vijuese.
“Ndryshimet e propozuara janë në përputhje me përcaktimet e dispozitave ligjore aktuale të ligjit, ato parashikojnë njohjen dhe përfshirjen që ka shqetësuar beprimtarinë e kësaj kategorie dhe që është mos shlyerja apo shlyerja me shumë vonesë e detyrimeve që ndërmarrjet tregtare kanë ndaj tyre. Mos shlyerja në kohë e detyrimeve për prodhuesit bujqësore krijon jo vetëm një zinxhir të vonesave në pagesa por ndikon edhe drejtpërsëdrejti deri në pamundësi të vijimit të aktivitetit bujqësor e blegotori në sezonet vijuese,”-shkruhet në projektligjin e depozituar nga Braçe.
Po ashtu, nënvizohet se ligji në fjalë parashikon likuidim të faturave brenda 30 ditëve kalendarike pas datës së marrjes prej debitorit të faturës ose të marrjes së mallrave apo shërbimeve, dhe si rregull i përgjithshëm, vonesa në pagë s’duhet të jetë më i gjatë se 60 ditë kalendarike.
E po ashtu, saktësohet se këto ndryshime nuk kanë efekt në buxhetin e shtetit.
