Ministrja e Financave Delina Ibrahimaj, ka deklaruar sot në Komisionin Parlamentar, se borxhi u rrit për shkak të pandemisë dhe tërmetit jo si qëllim i qeverisë.
Ibrahimaj, ka shpjeguar se buxheti i vitit 2022, parashikon ulje graduale të borxhit dhe deficitit.
“Nuk është e vërtetë që ne parashikojmë të vijojmë me rritjen e borxhit. Nuk është e vërtetë që ka pasur papërgjegjshëm sepse borxhi u rrit në të gjitha vendet për shkak të pandemisë,” ka thënë Ibrahimaj.
Sipas saj, eurobondi do të shkojë për mbështetje buxhetore, një pjesë për projekte një pjesë do të mbetet në balancë për vitin e ardhshëm.
“Jemi duke u përgatitur për një strategji. Informaliteti nuk është dukuri që mund të pasqyrohet në një buxhet. Ka shumë zëra të buxhetit ku kanë si synim uljen e informalitetit. Bëhet nëpërmjet nismave ligjore. Është dukuri që duhet të fillojë të luftohet nga qeveria. Kryefjalë është dixhitalizimi dhe reforma e fiskalizimit. Çdo faturë dhe transaksion i kryer do të jetë i lexueshëm nga administrata,” ka thënë ministrja.
Rikujtojmë çështë Eurobondi
Eurobondet janë letra me vlerë të qeverisë, që blihen nga institucionet e huaja që janë të interesuara të huaj, në varësi të ecurisë ekonomike që ka pasur Shqipëria. Pasi një institucion financiar ndërkombëtarë është i gatshëm për të financuar Shqipërinë me një vlerë të tillë, bëhen të ditura edhe interesat me të cilat do të merret ky borxh.
Eurobondi përngjan me një kredi pasi merret me normë interesi dhe në momentin që ai shlyhet shteti duhet të paguaj edhe interesin dhe jo vetëm vlerën e marrë, por ndryshon në faktin se ato janë likuide dhe listohen në bursa, pra ato mund të shiten dhe të blihen në çdo moment nga investitorët.
