Edhe pse reshjet e dëborës kanë mbaruar, disa zona rurale vijojnë ende të jenë të bllokuara, pasi rrugët janë të pakalueshme nga bora dhe ngricat.
Kjo problematikë nuk vihet re në akset krysore të qytetit, por në rrugët që lidhin fshatrat me njësitë administrative.
Bëhet fjalë për rrugët që lidhin fshatrat turistike të Dardhës dhe Voskopojës, ku qarkullohet vetëm me zinxhirë. Vijojnë të mbeten të izoluar fshatrat e Mokrës në Pogradec, Panariti, Shtylla dhe Vithkuqi në Korçë dhe fshatra të thellë malorë të bashkisë së Maliqit.
Temperaturat nën zero kanë bërë që bora të mbajë më gjatë se në qytetet e tjera. Banorët e zonave të gjendur përball këtij problemi kanë nisur vet me punë vullentare të zhbllokojnë rrugët.
Edhe rruga që lidh Librazhdin me Peshkopinë është e mbuluar nga bora dhe kalohet vetëm me zinxhirë. Edhe zonat e thella në qarkun e Shkodrës kanë hasur probleme me reshjet e borës.
Përpos Thethit i cili vijon prej kohësh të jetë i bllokuar, zona të tjera që kanë pasur probleme janë Fushë-Arrëzi dhe Vermoshi. Edhe në qarkun e Kukësit disa fshatra vijojnë të jenë të bllokuar.
Sipas raportimeve të banorëve, deri më tani nuk është parë asnjë borëpastruese, duke i lënë të pakalueshme disa prej rruugëve.
